【分享】台灣健康檢查 初體驗

註: 以下分享的是"定期身體健康檢查",而非申請居留證用的"體檢".


很多谷友向我查詢上次分享會中提及的台灣健檢經歷. 咁不如我公開分享一下.
請諒解我唔方便公開醫院名字,如有需要請私訊我吧.

為確保健康,我同先生響香港都有定期健康檢查(健檢)的習慣,來台後發現這裡很多私家醫院都提供健檢服務,不僅項目繁多收費亦比香港便宜. 向本地人索料後,決定選擇區內最大的私家醫院進行健檢,並選擇比較全面的套餐另加"大腸鏡"及"胃鏡".. 每人費用都祇係台幣三萬多!! 呢個價錢響香港祇能做一次大腸鏡而已!!

電話訂購健檢套餐及選定日期後,隔天收到速遞送來大包禮物,
包括: (1)健檢流程說明(2)樣本樽(3)瀉藥(4)代餐(日本製!)

健檢前一天,按指示吃瀉藥及代餐以清空肚子,為照大腸鏡作準備. 瀉藥果然十分強勁,令我有萬馬奔騰,一瀉如注的快感..

健檢當日,因為照胃鏡後唔可以揸車,我同先生便乘搭十公里免費(!)的公車來到醫院,準時八點報到後就獲安排每人一位服務主任接待! 而呢位服務主任真係100%全程跟住我,祇有更衣及做私密檢查時除外(笑).




服務主任先帶我到休息室(環境舒適,有電視同雜誌,大梳化仲望到高美濕地)並向我索取過往病歷資料及詳細解說整個驗身流程後,便帶我到裝潢豪華的更衣室(虛榮)換上由醫院提供的全套衣服. 原本以為係例牌睡衣款,但竟然似運動衫design,而且收費已經包埋,真係大鄉里.

九點開始健檢流程,基本上就係去不同檢查室接受檢查及見專科醫生. 重點係,這些醫生正是醫院內的專科醫生,每天會先到這樓層幫忙健檢,才繼續餘下工作! 所以每位服務主任手持的對講機係有實際用途(唔係用來扮野架),除了確保下一個檢查室ready才帶我過去,更重要係協調醫生的到場時間,確保流程順暢,醫生同檢查人士都係”零等候”. 這樣高效又體貼的服務令我印象非常深刻.

最後一站,也是今天的重頭戲,就係照"大腸鏡"及"胃鏡". 因為從來冇做過(香港太貴唔捨得),所以今次特別加埋,買個安心. 聞了三秒麻藥我就失去知覺..醒來已經躺在回復室中,服務主任確保我充分休息後,才帶我到更衣室沐浴更衣.

最後約埋睇報告時間,再接過兩份豐富午餐盒,正式完成今天健檢行程. 時間尚早,我們臨時決定上頂樓旋轉餐廳,一邊欣賞風景一邊享用午餐,然後回去接細路放學.

總結這半天行程非常暢順,環境寬敞舒適,”一對一服務主任”的安排更令我有VIP的感受呢!
相對我以前在香港的健檢體驗(房間窄小/流水作業/不斷排隊),台灣醫療服務的CP值真的超高,難怪越來越多精打細算的香港人來台灣旅行都會加插半天健檢呢!



p.s. 兩星期後睇報告(精美訂裝書+兩隻CD),醫生唔單止耐心解說每個細項,亦有問有答. 有需要的話,更可順便預約專科醫生跟進,十分方便.

p.p.s. 最終,膽固醇正常但偏高,醫生叫我做多d運動同控制飲食. 遵命!!

(順便參觀了樓下的醫學美容中心)

請諒解我唔方便公開醫院名字,如有需要請私訊我吧.

~全文完~

【高雄一日農夫體驗】採火龍果．DIY小Q圓．香草Pizza．水果酵素

參加了高雄農業局舉辦的”一日農夫體驗”,上了寶貴一課,深切體會到原來”農夫唔易做”: 除了付出勞力與耐性,天氣變化仲可能會影響農作物收成.

===================================

報名/查詢: 高雄市政府農業局 www.odfkcg.com

===================================

🔻遊覽車帶我們到達的”杉林大愛村”,是其中一個安置2009年”八八風災”受影響居民的地方,他們的家園都被風災破壞甚至滅村了. 不少居民都開設了小店或工作坊,希望能創造在地的工作機會,自力更新.

🔻下車後需要步行10分鐘往農莊,生態導師沿路講解植物知識,一D都唔悶.
當開始見到一排排火龍果樹時,大家都很興奮,但奇怪為甚麼樹上不見火龍果?

🔻家姐立即落田探個究竟,祇見樹上有很多火龍果花,但果實卻寥寥可數.

🔻到達農莊,農莊主人面帶歉意地為我們揭開真相: 原來紅龍果需要雨水刺激才能從休眠期(冬季)甦醒過來,但今年一月後雨量反常地少,造成生長錯亂,花期滯後,嚴重影響收成.
團友知道後難免顯得失望,但卻沒有抱怨下去..似乎大家都明白,天氣反常已經令農莊主人損失慘重,我們又怎好意思再埋怨呢?

🔻雖然今年花期延後2個月,果實唔多而且細細粒,但也不影響我們體驗採果樂趣.
火龍果樹長滿尖刺,所以採果時要份外小心.

🔻唔講唔知,採火龍果原來唔係”摘”而係”剪”,看家姐的肉緊表情就知道.

🔻另一邊廂,農莊已準備好”DIY小Q圓”的場地.
今天做的Q圓是火龍果特別版,所以先將預先搾好的火龍果汁慢火加熱.

🔻然後加入小量地瓜粉(香港叫”蕃薯粉”)令佢”杰杰地”,方便下一步驟.

🔻將糊狀物倒進地瓜粉中,準備搓粉.

🔻原本熱到融咗的三個細路,一開始搓粉就即刻精神晒!

🔻細路對搓粉的那份熱情,大人係唔會明. 佢地隨時可以就咁玩一個小時.

🔻慢慢加水,形成粉團後再搓揉成長條. 看那種天然的粉紅色真漂亮啊~

🔻再切成一粒粒的”Q圓”便大功告成! 如果唔係即刻食,可以放入冰箱儲存.

🔻將”Q圓”煮熟,加上冰凍的糖水,便成為很好味的甜點了.
”Q圓”唔單止顏色靚,食落”Q彈”,中間的黑色種子也提升不少口感呢!

🔻離開農莊前,農莊主人帶來了驚喜: 荔枝任採!!
原來今年荔枝大豐收,荔枝多到摘唔晒,甚至出現”請唔到人”摘荔枝的情況.

🔻緊接前往大愛村的”山林作客”,是一家窯燒Pizza工作坊.

🔻導師詳細講解製作過程. 除了自家種的香草外,但盡量使用在地食材.

🔻o依? 點解餅底係粉紅色的?
…

原來餅底加入了 火 龍 果 肉 ! 讚啊~

🔻加上茄汁,灑上喜歡的食材..

🔻放入烤爐,大約兩分鐘就食得! (好快!)
註: 今次用的是”白窯”,祇有一個窯艙;上次窯烤麵包用的是”黑窯”,爐火是分開的.

🔻一起”開動”吧~

🔻無聊的爸爸和家姐整咗一個特別版Pizza: 派大星 Patrick Star !!
...
話說我本來唔知邊個係派大星,等家姐話”海綿寶寶”嗰個我先明.

圖左: 派大星開心的等待入烤箱
圖右上: 與派大星開心合照
圖右下: 派大星安詳的躺在烤箱中..阿門

🔻給烤熟了的派大星..仍然保持著微笑..

🔻原來派大星肚內裝滿芝士! 唔怪得咁漲啦!
冷血的爸爸帶頭品嚐這”傑作”,家姐細佬也要搶著吃~

🔻馬不停蹄,轉眼又到另一農莊,準備整”水果酵素”.
開場前,先品嚐農莊主人自製的”梅子水果酵素”,味道有點似梅酒.
註: 喝”水果酵素”有人話好有人話唔好,請大家自己了解判斷,而我祇係當作一個體驗活動而已

🔻農莊主人解說”水果酵素”作法及原理,更特別強調如果水果表面仲有殘留農藥,就會破壞發酵過程.

🔻”水果酵素”一般選用當季水果,今次就用檸檬.
材料: 當季水果, 沙糖
用具: 切板,刀,玻璃瓶

🔻先把洗乾淨的水果切薄片

🔻將水果片放入玻璃瓶

🔻加入沙糖後,將玻璃瓶密封.
放陰涼處(期間唔可以打開),開始時要隔天搖晃及排氣,三個月後就成為”水果酵素”了.

🔻活動結束前主辦單位仲送了”旗山香蕉”(高雄旗山區在50-60年代有「香蕉王國」美譽,後來因菲律賓平價香蕉而式微). 今次活動不僅增進知識也實在滿載而歸呢! 最後同荔枝,火龍果,小Q圓,香蕉,水果酵素來一張大合照,結束收獲滿滿的一天.

===================================

報名/查詢: 高雄市政府農業局 www.odfkcg.com

===================================
(全文完．謝謝收看)